Ïn eurconte des ïnduchtriâs m’lïns è oûere
tchu les tchaipurons di Djura
o
Lai mâfoûeche faite en nôs dgens
Dédiè en tos ces que l’yéraint
èt pe âchi en ci Don Quichotte èt Sancho Pança
que n’ poéraint pe l’yére
Ïn eurconte des ïnduchtriâs m’lïns è oûere
tchu les tchaipurons di Djura
R’dyïndiat
Nian, daimes èt chires, vos ne saites pe ç’ que ç’ât qu’ïn ïnduchtriâ m’lïn è oûere ! Bïn chur, vos cognâtes les virattes : vos en èz craibïn ensoinnè ïn côp o l’âtre daivô vos afains : vos èz trovè ïn soûeta, ïn çhô, èt pe vos èz çhoulè ïn moéché d’ paipie o bïn d’âlu bïn piaiyie enson d’ çte vouidatte... mains, è n’ fâp’ rébiaie doues rondolles ! Aiprès, vous peutes piaîntaie ci virlitou dains vot tieutchi : ç’ât vrâment bé tot piein, o bïn d’maindaie en vot boûebe d’ rittaie dains lai sen d’ l’oûere daivô çt’ endgïn dains lai main : ç’ât brâment aimujïn. Mains, ïn vartâbye ïnduchtriâ m’lïn è oûere, ç’ât ènne tot âtre tchainson ; è ne s’aidgeât pu d’ faire bé o bïn d’ rujôlaie, è fât que çoli raippoétche des dégrâs èt pe miedge po l’ rechte. Voilì tote lai diff’reince.
Premie copyèt
Tiaind qu’ l’Etat é prepôsè po l’annèe 2009 lai RPC, que se dit «paiye’ment è valou côtaint», ènne sorvéniaince obïn des chubjides de 17 è 20 cts pai kw/h po l’eurnovébye l’éyètrichitè, les arayes des éyètriçhïns s’ sont aich’tôt drassies :
- Daivô les crômas d’ lai Confédérâchion, lai vendaidge de voidges confiermâchions, èt pe lai soutchie è Dain’mark d’ ces novés m’lïns è oûere brâment pu hâts, -djusqu’è dous ceints métres-, que bèyant des kw èt pe des kw c’ment dj’mais vu, çoli ât d’vni djutou.
- Tos les étius qu’ nos ains graîche en nos aivâlous qu’aint fâte d’éyètrichitè, nos poyans les piaicie è dieche po ceint èt pu ; èt poquoi pe les botaie dains l’ Djura : an diant que lai-vâs, l’oûere tire.
- È câse d’ lai çhail’tè des oûeres di Djura, -5 métres/sgonde en moiyeinne èt le doubye en mèe d’ lai sen d’ Méneût-, poch’que ces m’lïns è oûere n’ bèyant d’ l’éyètrichitè que quéques côps èt qu’an n’ poyant en faire des valmons, è nos fât r’nouquaie les m’lïns ensoinne daivô di flé dains l’ cie, -poch’que dos-tiere, ç’ât pu tchie-, èt pe botaie çte voidge l’éyètrichitè dains lai fèrnie des leignes des internachionâs l’étchaindge, èt dïnche, an poyant breûlaie ci bran d’ voûedge l’énerdgie tot de cheûte, èt pe, tiaind qu’èlle fûele, nos eurdiaingnans !
- È nos fât aittieudre tot comptant èt pe traivaiyaie dichcrèt’ment aivaint que lai yoi feuche tchaindgie, èyue en ces novèlles hâtes ugines.
- Nos ne v’lans tot de meinme pe pûeraie po dous o trâs paich’rattes que crachant tchu çte hât pyaité dains ènne résâvre d’Ïndyens è câse des novés tch’mïns qu’è faré caiyeûtès en traivie d’ ces quervelles : musans ès étius !
- Dains l’ Djura, nos airains des eurtairdgies, des teûrpeunous, des teûnés, des brelus èt pe des beurlandous d’vaint nos : è nos fât seurfaie tchu lai vaîdye, oquè.
Doujieme copyèt
Dalì, les privèes chochietès des prôdujous d’éyètrichitè de Bierne (FMB), de Liestal (ADEV), de Dgenève (SIG), de Chiasso (Reninvest), de Neûtchété (ALPIQ) s’ botant â traivaiye : è fât d’aiboue aipparayie l’ décoûe èt s’ bèyie ènne vierdge imaidge daivô des dos-trétaints.
Tchie ADEV, des Allmouss bïn éyeuvès, an orine ènne chochietè pai aictions vendues en des dgens di coénat d’ Liestal que sont bïn chur des chitoyeins : le paîgre de Sïnt-Braix tchu l’ tchaimpois di Plain sré ïn «chitoyein paîgre», èt les dous m’lins è oûere s’ nanmraint les «graindes daimes». Voilì, çtu o bïn çté que ne sré pe d’aiccoue sré bïn chur ïn croûeye chitoyein.
È Bierne, les FMB v’lant éparèyie l’aiveni en épreuvaint les novèlles vies de l’eurnovébye, poch’que l’ gaz, l’ tchairbon, l’ènerdgie des dieunés, èls les aint dje. Dains l’ biernois Djura, èls tèchtraint l’ s’raye èt pe l’oûere : çoli n’ât pe trop croûeye tchu l’ Mont S’raye, tchu l’ Mont Crosin èt tchu lai Montaigne di Dreit, en aittendaint bïn chur d’ s’élaîrdgie tchu l’ rechte di paiyis. Po çoli, èls faibritçhant lai chochietè «Juvent» èt pe ènne âtre, «Sol-E». C’ment èls aint brâment d’ peutou, èls porïnt âchi voûere po des inter-caintonâs paîgres qu’airïnt è nom «collaborâchion inter-djurassiene» : çoli dairait raichurie les dgens èt allaie dains lai boénne sen ! ét pe, po s’ bèyie d’ lai tchatche, èls aint âchi pris des paîts tchie «Swiss-Eole», poch’que çoli fait brâment sciençou ès eûyes di pubyic.
È Dgenève, les SIG s’aidrassant en des dgens de Chiasso : ç’ât lai multinachionâ chochietè Reninvest que dit qu’èlle ât lai moiyouse tchu çte bôle dains totes les spéchialitès mains que niun ne cognât, sâf craibïn tchu les îyes Caïmans. Èls sont churs que les m’lïns è oûere n’aint ran qu’ des aivaintaidges, èt chutôt pe de défât poch’qu’ èls bèyant d’ lai voidge l’éyètrichitè. Les SIG musant, daivô pe mâ d’airrogaince poch’que ç’ât tot de meinme yos qu’ botant les sôs en aivaint, qu’ è fât, è tot prie, taipaie dains lai résâvre des oûeres des Faintches-Montaignes. Pu èls piaîntant de m’lïns, pu èls diaingnant !
ALPIQ, è Neûtchété, fait des eûffres muattes tot paitcho. «Votaie ALPIQ», ç’ât tot. Ç’ât dje ènne féyaye chochietè de féyaye chochietè èt pe ènne aib’nâ l’entreprije.
Trajieme copyèt
Mitnaint que les éyètriçhïns aint ènne djuridiche d’vainture, èls poyant envie yos yices tchie tos cés que pochédant des tieres tchu les tchoupâs di Djura. Po çoli, aint-èls dit en ces tcheussous, prentes ïn o dous biats po vos bïn s’ faire compare, mains chutôt faites des promasses. Tiaind que vot hanne sré convaintçhu, bèyites lu ènne conv’niaince è saingnaie po vinte o bïn trente années, èt pe botèz-y en d’dains ïn airti qu’ empâtchi ès paitchies de se déjolaie o de s’ piaindre de quoi que ce feuche. Ces dgens dairaint nos faire fiaince poch’que ç’ât nos que v’lans s’ ottiupaie de tot.
Chutôt, ne rébièz pe not polititçhe : le ceint po ceint des nurainces po les Fraintches-Montaignes, piepe un pochte de traivaiye li enson, èt pe, bïn chur, le ceint po ceint des dégrâs po nos !
Tiaitrieme copyèt
Tiaind qu’ ces traquous sont eur’vni, le vait-bïn était encoé pu graind qu’échpérè : les dgens qu’aint des tieres sont aivus brâment ïntrassies en ces eurnovébyes l’énerdgie poch’que çoli yos raippoitchré des sôs bïn soie. Ç’ât s’vent les méres de p’téts v’laidges que sont meinme d’aiccoûe d’ faire ènne paitchie di traivaiye po nos, po s’ botaie en aivaint. È Sïnt-Braix, le mére Froidevaux ât tot djoéyou en l’avisale de diaingnie d’ l’airdgent aîjiement èt pe èl é totes les tieumènnes en sai dichposition. Inechpérè, nian ? Bïn chur, nos ains daivu promattre des baîrres po yos pétures èt pe ïn côp d’ main po ènne piaice po yos écouvures, mains, qu’ât-ce que vos v’lèz, è fât bïn coitchie lai miedge â tchait, èt pe, po nos, ç’ât des roudges raippes, non pètes ?
Po les Vés, vos peutes, daimes èt chires, reyére l’ecmencement d’ènne fôle d’ ci Diu Soûedgé, qu’ è graiy’nè â siecle péssè :
« Le mére et les consoillies di Peû-Tchaipatte aivïnt che pô de sené que çoli ne saivaît pu dïnche allê dains lai tieumnâtê. Ah nian, è n’y en aivaît pe, tot pai la Montaigne des Bos, de pus mâfins que ces-li. An se piaingnaît de yos dains totes les mâjons. »
( Le djetun de vouépres, in «Contes fantastiques du Jura», Pré-Carré, p. 134)
éh bïn, voilì, ç’ât encoé d’ neu temps ! Èls aint tot saingnè sains posaie d’ quechtions poch’qu’ èls sont chûrs qu’ èls vaint vet’ment s’ rempiare les baigattes, mains è ne fât le dire en niun, ç’ât des dgens que ravoétant l’aiveni !
Cïntçhieme copyèt
Po mâ-avisaie le p’tét peupye, les éyètriçhins déchidennent d’ensoinnaie ènne «PowerPoint» preujentâchion :
- È nos fât des imaidges pu bèlles que cés d’ lai pubyicitè po les prôduts d’ yuxe èt n’ môtraie que les pu bés détaiyes de l’évoingnâscience d’ ces bouédegeniaintes maitchines è sôs.
- Po embèlli, an porïnt, tchu les imaidges, rempiaichie les m’lïns pai des époulats o bïn pai des çhioés d’ piche â yét !
- Mains, ç’ât chur : des çhioés d’ piche â yét èt pe d’ l’oûere, çoli bèye brâment de p’tétes vangnes ! hi hi hi. An porrïnt âchi y botaie des tchvâs èt pe ènne fuatte o l’âtre, poichi, poilì, mains è faré trutçhaie les imaidges en tchaingeaint les pierchpèctives.
- Che vos môtrèz ènne d’ ces maitchines en mairtche, copèz l’ sïn : l’ traiyïn d’ nos m’lïns, ç’ n’ât tot de meinme pe l’ tchaint des chireinnes !
- D’aiccoûe, mains po endoûerlaie les dgens, è fât âchi botaie quéqu’ tchiffres piaiçès toudge dains l’ meinme ouerdre, en f’saint des sâts d’ïn sabat tchu ènne saivaite po bïn môtraie qu’ nôt crôma, ç’ n’ât pe des rujes.
- Vos les peutes entchairpaiyie daivô des éyètriçhes yunitès, djazaie d’ faimilles, d’ ménaidges, de dgiga-, de téra- ; vos peutes meinme pailaie d’ïn vârtabye induchtriâ émeûyaidge po l’ v’laidge, mains, po pu taid... o bïn aibaingnie lai laindye d’ bôs !
- Stu que djaseré peut âchi dire que tote çte preujentâchion ât ènne porvoiyâ l’ébâtche èt que nos sons prâts è tchaingie l’ouerdre de tos les m’lïns.
- Che çoli n’ seuffit pe, stu que preujentré poré faire è pavou ès dgens en diéjaint : «che, ïn djoué, vos n’ trovèz pu d’éyètrichitè en drie d’ vot prije, nos srains aidé lì mes aimis, po vos en vendre, poch’que ç’ât nos que dieûnant l’ butïn».
- Mains, vos saites, aiprès çt’ oûeyatte, è l’houre que sré, èls vaint tus dreumi poch’que, dains ènne boussèe, èls dairaint traîre yos vaitches.
- éh bïn, vos voites, çoli vait bïn s’ pèssaie, èls sraint prâts è dire «aîye» en tot po poyait reintraie en l’hôta, mains, po que çoli s’ pésse encoé meu, ne rébiètes pe de tradure tot çoci en ci frainçais.
Chéjieme copyèt
Di temps d’ çoli, les dgens di Djura, âchi dains les Fraintches-Montaignes, aivïnt dje oyi djazaie des m’lïns è oûere : èls étïnt â laivi, an ne saivait pe laivou èt pe, tchu les imaidges, èls sannïnt tot p’téts. Èls f’sant eûvraie de l’oûere que n’ côte ran èt pe èls bèyant d’ l’éyètrichitè, qu’ât-ce que vos v’lèz de meu ?
É y en aivait âchi brâment que s’en fotïnt, èls aivïnt âtre tchose è faire èt pe, tiaind qu’ ç’ât tchie les âtres...
D’âtres encoé musïnt qu’é fayait tot de meinme étre polititçh’ment daidroit èt s’ môtraie ïntrassie pai ces novatès de l’eurnovébye que, tchu les imaidges, ne boudgeant pe, ne f’sant pe d’ bru èt pe, l’ paiyisaidge, en d’vaint, ât che bé qu’an en srait quasi djailou.
- L’ s’raye, ç’ n’ât pe mâ non pu, mains mitnaint, an ne djazant pe d’ çoli.
Chètieme copyèt
È cainton, an dait aivoi l’oûere d’ contrôlaie l’énerdgie. Dalì, an d’mainde en 2002 â tchef Nusbaumer d’ l’aiménaidg’ment d’ lai cènie, de drassie ènne catche di paiyis en botaint di roudge tchu tos les coénats de pu d’ mil métres de hâtou. Voilì, le toé ât djue : an diraint que c’ ât lì qu’ ç’ât craibïn ïntrassaint po l’eurnovébye èt pe çte catche, sains en djazaie en niun, ç’ât mitnaint ïn «caintonâ diridgeou pian». Daivô ci djecrandûe, l’ menichtre Schaffter peut saingnaie des dérogâtions è l’airti 24 d’ lai LAT, lai féd’râ yoi tchu l’aiménaidg’ment d’ lai cènie, poch’qu’èl muse que ces m’lïns bèyant d’ l’éyètrichitè voidge c’ment nos pétures, pu douche qu’ lai pée d’ diaîle èt âchi condangnouse que l’ mié. Po l’ rechte, ç’ât les meinmes yois que cés po conchtrure ïn p’tét l’hôtâ ! L’aidmenichtrâchion peut dïnche s’ môtraie eûvie èt compyice daivô les éyètriçhïns, tot en aiyaint l’oûere d’aivoi aîtçhe è dire li tchu.
Heûtieme copyèt
En lai Tossaint 2009, les Tchievres oyant â d’ tchu d’yo téte c’ment des ogés d’ fie que d’moérant aidé tchu piaice : ces végïns détieuvrant, tot d’ïn côp, lì enson, dous ïnduchtriâs m’lïns è oûere. éh bïn, vos y voilì, dains lai miedge : èls sont tot écâmis, mains, èls n’ain’p’ encoé tot vu. Èls ne cognéchant pe encoé les effaîts d’ lumiere èt d’ailombre, les ultra-sïns, les infra-sïns, les dj’taies d’ dyaice, le maichacre di paiyisaidge, lai piete d’ lai foncie valou des mâjons, l’éyètrichitè dains l’oûere èt bïn d’âtres nurainces.
Dâs mitnaint, les végïns s’ yeuvant daivô les ïnduchtriâs m’lïns è oûere èt s’ coutchant daivô les ïnduchtriâs m’lïns è oûere, che ç’ n’ât pe le r’boué.
Meinme che an n’en ât pe tot drèt végïn, an les voit bïn viraint tot l’ temps, èt pe lai neût, èls bânitçhant sains râtaie li enson daivô des roudges lumieres. È n’y é que dains les brussâles qu’an ne les voiyant pe... mains èls sont aidé lì, èls dèroquant, èls déraindgeant tot l’ temps. Èls heursenant èt étchairpoulant tot l’hourijon en étiafaint daivô oûetraince nos fies saipins de maints côps yo hâtou ; èls prégnant le r’dyaîd sains dj’mais l’eurbèyie, èls raittirant les dous l’eûye en viraint tot l’ temps en ïn saitcheû mov’ment, daivô l’ raigat d’yos trâs londges pâles tot roudge poch’qu’ èlles copant lai téte ès ogés d’ paissaidge, çté des tchavéch’ris, aito.
An n’aivïnt dj’mais vu d’ che prés des ujines sains ôvrie âchi hâtes, que traivaiyant sains râtaie en euviaint des vibrâchions dains l’oûere chèt djoués tchu chèt.
Nûevieme copyèt
L’enfie é euvri ses poûetches : mitnaint, vos étes tus des prij’nies l’ôtaidge. Les ïnduchtriâs m’lïns è oûere vaint trasformaie lai vétiaince dains les campaignes. R’nâchèz, véyes v’laidjouses eurgraignes, djailojies, ètchâdèz lai misse ès dgens, rantiûeres, peûrâtes l’ambyaince tot paitchot. Les ïnduchtriâs m’lïns è oûere sont dains l’ beûye bïn chur, mains âchi dains vos tétes : vos y musèz tos les djoués èt vos peutes en dire aitaint d’ mâ que d’ bïn, èls otiupant aidé le d’vaint d’ lai sceînne, d’ènne mainiere o d’ènne âtre.
È case d’ l’éyètrichitè èt pe des aîmantès tchaimps que ces m’lïns eurbotant dains l’oûere, vos étes diaingnie pai ènne novèlle malaidie que vait s’en pare en vot caidre de vétiaince ç’ât chur, mains chûtot en vot en d’dains vétiaince, daivô des tchaindg’ments d’aigrun, d’ l’aidôdj’ment, d’ lai nervousitè, des fraides chvous, des laindyures, d’ lai sôl’tè, des troubyes d’ lai sanne, des aimboîyes èt pe ïn déd’vni d’ vos raipports daivô les âtres.
Diejieme copyèt
- Mains, vos étes des piaîngnous, que diant cés que s’ sont dje embaigatè des sôs : les comm’nâs l’autoritè aint dit que les yois aivïnt aivu rechpectèes !
- L’ bru n’ât pe pu graind que çtu di traifitçhe : vos n’ dites ran li-tchu èt pe, vot mâjon, vos lai daîtes vendre en cés qu’aint brâment d’ sôs...
- Musèz putôt â nïmbre de tyuryous que vaint v’ni tchie nos po aidmirie ces ïnchtallâchions.
- èt pe, les éyètriçhïns v’lant freinaie ces m’lïns èt pe èls f’sant tot ç’ qu’ è fât po yuttaie contre totes les nurainces, en dépeinchaint des graindes mijes. èt pe èls sont meinme d’aiccoue de dépôjaie, pu taid, yos paipies dains lai tieumene.
- Èt pe, qu’ dit l’ mére Froidevaux, poidgeon, les autoritès, vos craites que ces m’lïns s’ règlant d’ïn côp de vire-viche ? èt pe, ces aichattes, èlles étïnt daindgérouses daivô yo aidieuyon ; èt pe, le tchenne, ç’ n’ât pe bon po not djûenence ; èt pe, ces bass’notaies tchu les mus, ç’ât tot des vouichèt’ries, des maizantès de tiu d’épenne, èt pe, coènemâtiu : les ïnduchtriâs m’lïns è oûere vos bèyant l’ bonjoué.
- Che vos laichèz vot dyimbarde daivô les lumieres èt pe l’émoinnou en mairtche dos sai tchaimbre è coutchie, cobïn d’ temps èl veut t’ni ? Che ç’ât ïn poula que gotte, lai neût, qu’ât-ce que vait s’ péssaie ?
Onjieme copyèt
D’aivédje, les ôtaidges se seûmâtant vit’ment en aidoptaint lai mainiere de musaie des pregnous d’ôtaidges poch’que ces apchars sannant aivoi ènne michion, qu’èls aint d’ lai foûeche èt pe d’ l’airdgent ; ci tchaindg’ment d’aivijoûere nécèchitré, che lai prije d’ôtaidges s’ finit en les léchaint en vétiaince, ènne sôt’nie l’ïntérveintion des méd’cïns d’ l’échprit po les raimoinnaie en lai normâ. Les véyes l’ôtaidge en voidgeraint poétchaint ènne biassure po l’ rechte d’yos djoués. Mains tchie nos, les prij’nies l’ôtaidge aint oûejè s’ piaindre d’yo soûe èt aint eur’fusè çt’ aivôtche. Èls se sont raissembyès èt aint ïndg’niè «Yibreoûere» que dit mitnaint qu’ les tchaipurons di Djura ne sont pe faits po les ïnduchtriâs m’lïns è oûere, qu’ l’oûere ne tire pe prou foue, qu’ïn m’lïn è oûere ne bèye quasi ran èt ran que de temps en temps. Èl en farait ïn miyie de Dg’nève è Baîle, -mains pe envirvô d’ ces doues velles- po rempiaichie Muehleberg. Les ïnduchtriâs m’lïns è oûere, que virant tot l’temps mains que n’ beyant d’ l’éyètrichitè qu’ïn djoué èt d’mé pai s’mainne, dépeutant not naiture èt èls ne sâvraint pe l’ monde ; èls sont pés qu’ les envayéchouses échpèches que f’sant poétchaint che pavou.
Ces dgens aint fait saingnaie des tieum’nâs l’ïnichiâtive po ïmpôsaie des morèp’tous o bïn po envoidgeaie les m’lïns è oûere tchu les tieumnâtès èt pe, mâgré l’ tchef Schneider di cantonâ sèrvi des tieumenes, qu’airait meu fait d’ pichie â yét que d’ voyait eurniquaie ènne déchijion vôtèe pai les dgens ran que d’ènne voûe, èls aint diaingnie è lai Tchâ-des-Breûleux, ès Dgen’vèz, â Nairmont, ès Enfies, è Meuriâ èt chutôt è Borgnon laivou que l’ mére Kohler de Dlémont, daivô lai compyichitè des SIG èt d’ Reninvest, é botè tchu pie des prodgèts dègnes de Hoollyywood tchie ses végïns.
Dojieme copyèt
È Sïnt-Braix, aiprès l’ vèrnéchaidge des «so genannten grossen Damen» pai ADEVwindkraft, daivô dichcouès en allmouss, prôduchions d’ïn treuplé d’ coénattes des Alpes èt pe aipéro daivô r’cegnat po les trâs autocars d’ chitoyeins de Liestal v’ni tot échqueprès, les novés prodgèts aint foédg’nè. An en djaze â Nairmont, è Laidjoux, ès Djen’vèz, ès Bôs, è Dlémont, è Pieingne, è Traimlâ, èt pe âtre pait aito.
L’mére Froidevaux d’ Sïnt-Braix, lu, ainnonce dje que les novés m’lïns vaint raippotchaie brâment pu : èl é tchoisi d’âtres compyices que promattant des pries pu ïntrassaints que cés des dgens d’ Liestal : ç’ât les SIG èt yo dos-trétaint Reninvest. Po botaie l’ airdgent dains l’eurmige, èl é ïndg’nie ènne chochietè po l’ paîgre qu’vïnt èt qu’airé è nom «Sïnt-Braix II», ïn nom c’ment qu’ïn âtre po s’ bèyie ènne sciençouse imaidge, mains po les dgens, ç’ât l’ cèrneut di Ban Dchu èt pe çtu d’ Graitery. çte chochietè ât maîrtçhèe â r’tieuy’rat di coumerce dos l’ nom de «Parc éolien de Saint-Brais S.A.» daivô l’ mére c’ment préjideint sains dreit d’ saingnaie, èt c’ment ménaidgeous, dous Bèldges des SIG, dous Téchinois d’ Reninvest èt pe ïn s’crétariat que s’ trove en lai comnâ aidmenichtrâchion de Sïnt-Braix. Po s’ïmposaie, les SIG promâttant 30.000 fraincs â Consaye èt en l’Aissembyée, que sont tochu d’aiccoûe de r’cidre çt’airdgent.
Aittieuds mitnaint po ènne séaince po mâ-avisaie les p’tétes dgens. Dains la haule de djûe d’ Sïnt-Braix, les promovous récôlant yo yéçon, diant qu’èls sont les moiyous, mains qu’èls ne poyant pe botaie pu 6 ou 7 m’lïns tchu çte surfaice. Èls diant âchi bïn chur que tote yo preujentachion n’ât qu’ènne ébâtche èt que l’empiaiç’ment de tchétçhe m’lin peut étre tchaindgie, po empâtchie les dichcuchions trobïn endieûjèes ; èt pe, èls v’lant d’aibouè moénaie ènne raicoédgie tchu les oûeres di coénat : po çoli, èls sont v’ni drassie ïn échpèche d’épâ en fie de sèptante métres de hâtou â bé moitan di Ban Dchu.
Quéque mois pu taid, ç’ât è Yovlie qu’ènne novèlle séaince po mâ-avisaie les dgens ât chiçhèe pai les éyètriçhïns : mitnaint, è s’aidgeât di prodgèt «Sïnt-Braix II - Sceut». Le paîgre di Ban Dchu ât d’vni inter-communâ, qu’ât-ce me dire, le paîgre ât toudge pu graind èt pe les m’lïns sont toudge pu hâts. Mains ci cop, è y é brâment d’ dgens que ne sont pe d’aiccoue : an aint bé yos euffri ïn fraid métra, èls saint ç’ qu’è fât musaie d’ ces ïnduchtriâs m’lïns è oûere èt l’embeurlificot’ment de l’aidgent é taivu métraîyie pai l’aimoé des tchaipurons. Mains, vos voites que, po l’ peutou des SIG, de Sïnt-Braix è Borgnon, è n’y é qu’ïn seingne tchaipuron, dalì encoé d’ lai piaice po tos les m’lïns qu’an v’lant. An ne djazeraint pe d’ çoli tchu lai feuye, mains les contreloiyies aint eurdieûnè po les trâs pubyicâchions cognues d’ ci prodgèt.
Trazieme copyèt
L’ cainton, d’vaint les craichainnes contreloiyies èt po musaie tot piain piain en lai quechtion, é déchidè d’ byoquaie les prodgèts en raipport daivô l’oûere po dïnche étre tiytte d’ pare ènne posichion tchu l’ maichacre d’ nos paiyisaidges.
Èt pe è y é taivu Fukushima...
Dâdon, les éyètriçhïns s’ bouffant l’ moûére daivô des prochès po saivoi laiquée, de totes ces chochietès privèes èt en d’feûs di cainton, é le dreit d’ pairtichipaie en lai conchtruchion des novés paîgres è m’lïns. È y en é meinme yènne qu’é dit â d’vaint des tribunâs, po vendre sai mairtchaindije, que les ïnduchtriâs m’lïns è oûere de Sïnt-Braix èt di Peû Tchaipatte étïnt des èrtieulons èt que sai chochietè saivait brâment meu faire qu’ les âtres. Voilì, SIG daivô Reninvest aint predju, FMB, ADEV èt ALPIQ aint diaingnie poch’qu’ èls aint tot de meinme euffri po 220.000 fraincs de s’rayous captous â v’laidge di Nairmont, mains ç’ât les tribunâs que sont d’vni pu rétches.
D’âtres aint des probyèmes de baichnoûere po saivoi che les ïnduchtriâs m’lïns è oûere bèyant di laîd, di poûe o bïn ran qu’ïn po d’ tièvatte l’ ave, mains, c’ment qu’ les éyètriçhïns sont des tchèrvôtes, des baidous èt pe des p’téts catchottous, éh bïn, âdj’d’heû encoé, an ne saint toûedge pe.
Tçhaitoûejieme copyèt
- Quoi d’ nové ? - C’ment qu’ éls aint vôtè, ces Poilies ?
Drie copyèt
Vos èz vu, daimes et chires, qu’i n’ai pe botè d’imaidges dains ci techte : ç’ât poch’qu’ vos peutes voûere li enson l’échpojichion des édjaichâles, de djoué c’ment d’ neût, dâs tot poitchot. Mains, po tot de meinme fini en tchainson, i vos veus bèyie les dous dries copyèts d’yènne qu’ vos cognâtes tus, èt ci côp, les tyrans èt pe yos soudès, ç’ât d’vni ces ïnférnâs ïnduchtriâs m’lïns è oûere :
È les léchenn’nt tus bïn entrê (bis)
Aitain d’entrès, tain d’empâlès (bis)
Chi bïn qu’è n’yi d’morèt d’ lai rotte
Que l’officie pou boir’ lai gotte
Voili c’ment qu’ai nos fât fair’ tus (bis)
Fotre és tyrans lai pâle â tiyu (bis)
Tiain ç’ât qu’ nos airains lai victoire
C’ment Petignat nos poérains boire
èt qu’ vétieuchïnt nos bés patois !
Aivri 2012 J.-M. Juillerat
Raidjout po l’tchâtemps
Tot d’vaint, po beyie lai réponche en lai quechtion di tçhaitoûejieme copyèt, l’Aissembyèe di Nairmont è votaie è yeuvè main quasi ran que d’enne voue ïn morèp’tou de dieche annèes po ces ïnduchtriâs m’lins è oûere.
Po l’ trazieme copyèt, l’ cainton, que oûedj’ne ïn pian « énerdgie 2035 », è tot de meinme eûffri 30.000 fraincs po faire dire en l’ôffiche « Equiterre » (Vd) que les ïnduchtriâs m’lïns è oûere ne botant pe de maidjous richques en aivaint.
 dojieme copyèt en lai fïn, i peus r’botaie qu’ lai chouchietè « Kohle & Nusbaumer » è prepôsè d’ïnchtallaie des m’lins è oûere de dous ceints métres de hâtou è Pieingne, è Faihyi, è Graindfontainne, en Alle, è Vaindlïncoèt èt pe è Coértchaipoix, po ne djazaie que di cainton di Djura.
Lai cheûte, pu taîd...
|
|